„საქაერონავიგაციაში“ მიიჩნევენ, რომ საქართველო სატრანზიტო ჰაბად ყალიბდება და ქვეყანას შეუძლია პარტნიორი ქვეყნებისთვის მიმზიდველი საჰაერო სივრცითაც გახდეს.

„საქართველოს, თავისი გეოპოლიტიკური მდებარეობის გათვალისწინებით შეუძლია, უმოკლესი მარშრუტების მეშვეობით ხმელეთის მსგავსად, ჰაერითაც დააკავშიროს ერთმანეთთან აზია და ევროპა. საქართველოს საჰაერო სივრცე მოკლე და მოსახერხებელი დამაკავშირებელია ევროპასა და აზიას შორის, აღნიშნულით იგი კონკურენციას უწევს რეგიონში არსებულ სხვა საჰაერო სივრცეებს“, – აღნიშნავენ საქაერონავიგაციაში.

საქართველოს საჰაერო სივრცისადმი დაინტერესების დასტურად “საქაერონავიგაციაში“ საჰაერო ტრანზიტების რაოდენობის ზრდაზე მიანიშნებენ და განმარტავენ, რომ დღეს „საქაერონავიგაცია“ საქართველოს საჰაერო სივრცეში ტრანზიტულ ხომალდებს 19 მარშრუტზე ემსახურება. „ბოლო 4 წლის განმავლობაში დაემატა 6 ახალი საჰაერო მარშრუტი, რის შედეგადაც საქართველო სატრანზიტო კუთხით კიდევ უფრო მიმზიდველი გახდა ავიაკომპანიებისთის“, – ამბობენ კომპანიაში.

ამავდროულად „საქაერონავიგაციაში“ ახალი მარშრუტების ზრდის პოტენციზლეც მიათითებენ.

2016 წლის 17-21 ოქტომბერს თბილისში გამართულ ICAO-ს შეხვედრაზე საქაერონავიგაციამ RDGE ჯგუფს შესთავაზა 3 ახალი მარშრუტის დამატება. „ახალი საჰაერო მარშრუტები გააერთიანებს ჩვენი რეგიონის რამდენიმე ქვეყანას და რეგიონალურ ჭრილში მოიზიდავს უფრო მეტ ავიაკომპანიას“.

ამბობენ, რომ ყველაფერი ეს თანამედროვე ტექნიკას, სრულყოფილ ინფრასტრუქტურას და მაღალპროფესიულ კადრებს მოითხოვს, ამაზე საპასუხოდ კი საქაერონავიგაცია საუკეთესო ხარისხის მისაღებად ბოლომდე იხარჯება. შედეგად, საქართველოს საჰაერო სივრცე ევრაზიის დერეფნის ერთ-ერთი უმნიშვნელოვანესი ნაწილი გახდა და საჰაერო ხომალდების ნაკადმაც საგრძნობლად მოიმატა. მაგალითად, 2017 წელს 13.6 %–ით მოიმატა ფრენების რაოდენობამ.

თუ 10–15 წლის წინ საქართველოს საჰაერო სივრცეში დღე–ღამეში 80 საჰაერო ხომალდი დაფრინავდა, ამჟამად ფრენების რიცხვმა 500-ს გადააჭარბა. 6 თვის განმავლობაში საქართველოს ეკონომიკის სამინისტროს შპს “საქაერონავიგაცია” 64 407 ფრენას მოემსახურა, რაც 13.6%-ით მეტია წინა წლის ანალოგიურ პერიოდთან შედარებით.

www.bpi.ge