საქართველოს პრემიერ-მინისტრმა, გიორგი კვირიკაშვილმა დედაქალაქის მერ კახა კალაძეს სთხოვა, ბიზნესის უფლებების სრული დაცვით, ლაღიძის წყლები და სახაჭაპურე რუსთაველის გამზირს ისევ დაუბრუნდეს.

პრემიერ-მინისტრმა ამ თემაზე „გალერია თბილისის“ გახსნაზე ისაუბრა და კახა კალაძეს მიმართა.

„ვისურვებდი, რომ ლაღიძის წყლები და სახაჭაპურე, რომელიც დაკარგა რუსთაველის გამზირმა, მოვახერხოთ და ბიზნესის უფლებების სრული დაცვით, გამოვისყიდოთ და განვაახლოთ. ეს არის ბევრი თბილისელის სურვილი. ეს მნიშვნელოვანი იქნება ტურისტებისა და იმ ადამიანებისთვის, ვისაც ახსოვს და განსაკუთრებული მოგონებები აკავშირებს ლაღიძის წყლებთან“, – აღნიშნა გიორგი კვირიკაშვილმა.

საქართველოს პრემიერ-მინისტრის მიმართვას გამოეხმაურა თბილისის მერი კახი კალაძე, რომელმაც აღნიშნა, რომ ყველაფერს გააკეთებს „ლაღიძის წყლებისა“ და ცნობილი სახაჭაპურის აღსადგენად.

1tv.ge