ვაზისა და ღვინის საერთაშორისო ორგანიზაციის (OIV) სპეციალური ღვინოების ჩამონათვალში ქართული ტრადიციული მეთოდებით დამზადებული ღვინის შეტანის საკითხი განიხილება.

ქართული ტრადიციული მეთოდებით დამზადებული ღვინის შესახებ პრეზენტაცია პარიზში, OIV-ის ოფისში ღვინის ეროვნული სააგენტომ წარადგინა.

OIV-ის სამუშაო ჯგუფში გამართული მსჯელობის შემდეგ, საკითხმა სამუშაო ჯგუფის მხარდაჭერა მოიპოვა და განხილვის შემდეგ ეტაპზე გადავიდა. საკითხი პროცედურების შესაბამისად, მიმდინარე წლის შემოდგომაზე, OIV-ის აღმასრულებელი კომიტეტის სხდომაზე განიხილება.

2017 წელს OIV-იმ დაჩქარებული წესით განხილვაში მიიღო ქართული მხარის წინადადება, რომ ქართული ტრადიციული მეთოდებით დამზადებული ღვინო, ანუ ჭაჭაზე დადუღებული ღვინო (ქარვისფერი ღვინო), OIV-ის სპეციალური ღვინოების ჩამონათვალში შევიდეს.

OIV-ის ღვინოების ჩამონათვალში სულ 7 ღვინოა: შუშხუნა, ცქრიალა, შემაგრებული, ლიქიორული, ბუნებრივად ტკბილი ღვინოები, „აისვაინი“ და აპკის ქვეშ დავარგებული ღვინო (ხერესის ტიპი).

www.travelingeorgia.ge